Dagaal xoogan ayaa saaka waaberigii ka bilaamay tuulada Karin oo qiyaastii 40km dhinaca koonfurta ka xigta Boosaaso. Dagaalkaan oo ay soo qaadeen maleeshiyo ku dhuumaalaysanaysay buuraha Galgala oo daacad u ah nin lagu magacaabo Sheekh Maxamed Saciid Atam oo ah wakiilka Alshabaab ee gobolka Bari ayaa waxaa uu gaystay qasaare dhimasho iyo dhaawacba leh.

Wali si dhaba looma oga qasaaraa dhabtaa oo ka dhashay dagaalkaas waxaase cisbitaalka Boosaaso la geeyay meydka 3 askari oo ka tirsan ciidamada Puntland iyo 5 ale oo dhaawac ah.

Madaxweynaha maamulka Puntland Dr. C/raxmaan Maxamed Faroole ayaa shir jaraa’id ku qabtay magaalada Garowe oo uu kaga hadlay dagaalkaasi. Wuxuuna sheegay in dagaalkaasi uu dhexmaray ciidamada ammaanka Puntland iyo kooxo argagixiso ah oo Alshabaab ka soo dirtay koonfurta Somaliya. Madaxweyne Faroole ayaa sheegay inay ciidamadu dileen 13 maleeshiyo ayna gacanta ku dhigeen tiro ka mid ah raggii duullaanka soo qaaday oo uu ku jiro nin magaciisa lagu sheegay Jaamac Ismaaciil Ducaale oo  uu sheegay inuu hogaaminayay kooxdii weerarka ku qaaday tuulada Karin.Ninkaan la qabtay ayaa hadda ka hor weerar ku qaaday degmada Baargaal ee gobolka Bari isagoo wata dagaalyahanno ajaanib ah oo ay ka hortageen ciidamada Amniga ee Puntland illaa waagaasna ku dhuumaalaysanayay buuraha Galgala sida uu sheegay madaxweyne Faroole.

Madaxweyne Faroole ayaa ugu baaqay dadka reer Puntland inay si wadajira ula dagaalamaan kooxda Alshabaab ee weerarka ku soo qaaday. Wuxuu sheegay inay kooxdaasi dhibaatooyin badan ka wadaan koonfurta ay haatana doonayaan inay dagaalka Puntland u soo wareejiyaan oo qixiyaan dadka Puntland ee nabada ku nool. Wuxuu yiri waxay u socdaa inay idin qixiyaan oo xalaalaystaan hantidiina. Madaxweynaha ayaa intaas ku daray inaan loo kala hari doonin in Puntland laga safeeyo kooxda Alshabaab oo ku shaqaysa amaro dad Ajnabi ah u soo dhiibteen.

Dagaalka maanta ka dhacay tuulada Karin ayaa wararka ugu dambeeyay waxay sheegayaan inuu u durkay dhinaca buuraha Galgala oo ciidamada Puntland uga daba tageen firxadkii ciidamada Alshabaab. Waxaa kaloo magaalada Bosaaso lagu qabtay nin ka tirsan Alshabaab oo miino ku aasayay wadada dhinaceeda xili ay halkaas marayeen ciidamada Daraawiishta oo u socda jiida hore. Ninkaas ayaa loo kaxeeyay saldhiga booliiska halkaas oo lagu weydiinayo su’aalo la xiriira falkaan uu faraha kula jiray.

Mudugonline.com